|
روايتي الثانيه ...( في خطوتك .. سكتي)
السلام عليكم حبيباتي العدولات لو هتكلم عن الاشتياق فانتم بجد وحتشوني اوي ووحشني وجودكم معايا انا خلصت امتحاناتي ادعولي بقي يارب نتيجتي تطلع حلوه وادخل ثانوي عام وانا مرتاحه هتبدأ اجازتي بيكم وان شاء الله خلال الاجازه ابقي نزلتلكم الروايتين اللي مجهزاهم هبدأ معاكم بروايتي التانيه ويارب تعجبكم ♥
الروايه ....... ( في خطوتك ... سكتي ) عمرو : خد بالك من اخواتك يا كريم هما مالهمش غيرك دلوقتي انا عارف اني سايبلك حمل كبير بس انت راجل وقد المسئوليه وخد بالك من نفسك كريم : ارجوك متقولش كده يا بابا .... بابا ..... بابا رد عليا في تلك اللحظه تدخل ...... ( سمــر ) يمسح كريم دموعه بسرعه ويخفي حزنه ويقول كريم : مالوش يا حبيبتي هو كويس سمر بقلق : حصل ايه كريم : مفيش يا سمر بس حبيبتي عشان خاطري خدي نور وروحوا عند خالتو دلوقتي سمر باستغراب : ليه يعني كريم : علشان ... علشان صحابي جايين يقعدوا معايا وهيبقوا كتير اوي ومينفعش انتوا تبقوا موجودين وسطينا كده سمر بعدم تصديق : ممممممم اكيد صحابك جايين يعني ؟ كريم : ايوه سمر : طب هو بابا ماله بس كريم : يا قلبي مالوش اديتله الدوا ونام سمر : ماشي حاضر هاطلع اقول لنور ونمشي ديه هتفرح اوي علشان كانت زهقانه كريم : ماشي وجلس كريم بجوار والده يبكي ويتألم وعندما سمع صوت نور وسمر قادم نحو الغرفه نهض مسرعا يجفف دموعه ويقاوم المه نور : ايه ده يا كريم بابا نايم غريبه يعني مش ميعاد نومه د كريم : اه يا حبيبتي اصله جاله شوية برد فا اديته الدوا ونام نور : بجد سلامته اصلي كنت عايزه اسلم عليه قبل ما امشي كريم بقلق : سبيه شويه عشان مايقلقش نور بابتسامه : بوسه كده في الخفيف مش هتقلقه واندفعت نور نحو والدها فاستغربت عندما شاهدت وجهه الشاحب وشعرت بخمول جسده فاقتربت لتقبله وقتها شعرب ببرودته وكأن الدم قد هرب من عروقه فقبض قلبها وشعرت بغصه في حلقها وشكت في هذا الامر وقالت نور باستنكار : كريم ؟ بابا ماله يصمت كريم عن الكلام فهو يعلم كم نور حساسه ولن يستطيع ان يخفي الخبر عليها هي خصيصا فعندما صمت كريم تأكدت نور من اعتقادها وسرعان ما نزلت دموع سمر اما نور فلم تتحمل وعقلها رفض الواقع فسقطت مغشيا عليها حملها كريم لغرفتها وظلت نائمه مرهقه حزينه رافضه واقعها الاليم اما سمر فهي بجانب اخيها متماسكه قليلا وكريم يتماسك من اجل اخوته وانتهي العذاء وجلست سمر بجوار اخيها في الليل سمر بدموع : البيت فضا علينا يا كريم كريم يحتضنها ويخفي دموعه : لا يا حبيبتي متقوليش كده اومال انا ونور نبقي ايه احنا عيله واحده .... ربنا يرحمك يا بابا سمر بدموع : كان دايما يقول الكلمه ديه .. احنا عيله واحده كريم : سمر حبيبتي ارجوكي حاولي تتماسكي خصوصا قدام نور انتي عارفه كويس اوي بابا كان بالنسبالها ايه سمر : حاضر انا هدخل اطمأن عليها وبعدين اروح اوضتي كريم : ماشي يا سمر تصبحي علي خير سمر : وانت من اهله وفي تمام الساعه الثانيه بعد منتصف الليل في غرفة كريم ..... : كريم كريم : .. نور تعالي يا حبيبتي نور بوجه شاحب وملامح مصدومه ودموع : كريم خليك معايا كريم : حبيبتي انا جنبك نور : كريم انت اكتر واحد عارف بابا ده بالنسبالي ايه بابا حبيبي وابويا واخويا وكل دنيتي ومش هقدر احط كلمة كان ديه خالص عشان بابا عايش جوايا ماماتش وعشان انت فيك كتير من بابا عيزاك جمبي عشان اشوفه فيك وعشان تعوضني حنانه وقربه ليا كريم بدموع : يا بابا انا مش هسيبك ولا انتي ولا سمر انا جمبكم يا حبيبتي ومن هنا ورايح انا كل حاجه ليكم اي حاجه عايزينها تتطلب مني انا ليكم عينيا والله نور ببكاء : بس يا كريم بلاش تعيط فيحتضنها كريم كريم : حاضر .. حاضر نور : ممكن اطلب منك طلب كريم : اه طبعا نور : ينفع انام جمبك كريم بسعاده : اه طبعا يا نونو تعالي وبالفعل هدأت نور وذهبت في نوم عميق بجوار اخيها stop نور ,,, بطله من ابطال روايتنا عمرها 15 سنه مع انها في سن المراهقه بس جواها طفله صغيره اوي محتاجه الاهتمام والحنان سمر .... عمرها 22 سنه كلية فنون جميله فنانه ومشاعرها راقيه بس بينها وبين نور مشاكل كتير اوي مش بتخلص كريم ... عمره 25 سنه كلية هندسه كان بيحب قبل كده بس حصلت مشاكل وانتهي الموضوع بيحب اخواته اكتر من عيونه وبيخاف عليهم من الهوا الطاير وزاد خوفه ناحيتهم بعد ما والده اتوفي والد كريم كان مهندس وكان ليه رتبه كويسه في شركه كبيره بسبب كفائته وقدرته وطبعا كريم طالع لوالده وليه مهنته الخاصه اما بقي والدة كريم .......... هنعرف بعدين back وانتهت الحلقه انا عارفه انها صغيوره بس لسه قدامنا كتير والايام جايه اكتر فاكرين اسئلة التوقعات .. يلا بينا !! 1) تفتكروا ايه السر اللي مستخبي في والدة كريم كفايه عليكم كده .. وانتظروا احداثا مشوقه علي نار هادئه .. مستنيا التشجيعات يا عدولات مـــــريمــ |
رد: روايتي الثانيه ...( في خطوتك .. سكتي)
رووووووعة يا حبيبتي زي م إتعودت منك دايما إبداع بس إنتي عارفاني كويس مش هقدر أستنى يلا نزلي الحلقة التانية بسرعة وبالنسبة للسؤال هفكر في حل ولو عرفت هاجي أقوللك :3 وأحلى تقييم لعيونك متطوليش عايزة الحلقة الجديدة بسرعة |
رد: روايتي الثانيه ...( في خطوتك .. سكتي)
الف مبروك يا قمر عالروايه
وزى ما اتعودنا منك الرقه والاسلوب الهادئ وربنا ينجحك يارب وتدخلى المكان اللى تتمنيه |
رد: روايتي الثانيه ...( في خطوتك .. سكتي)
دايما في ابداع
|
رد: روايتي الثانيه ...( في خطوتك .. سكتي)
|
رد: روايتي الثانيه ...( في خطوتك .. سكتي)
اقتباس:
تسلميلي يا قمرتي الحلقه التانيه في المساء والسهره ان شاء الله :7: اقتباس:
اقتباس:
اقتباس:
تسلمي :227: |
رد: روايتي الثانيه ...( في خطوتك .. سكتي)
رائع يا قمر
كالعاده واف مبروك الروايه الجديده |
رد: روايتي الثانيه ...( في خطوتك .. سكتي)
البارت الثاني ( ايام وبتعيشنا ) في صباح اليوم التالي تستيقظ سمر بخمول وبالطبع لن تذهب الي الجامعه فقامت بتحضير الافطار لاخواتها ودخلت غرفة نور حتي تيقظها ولكن لم تجدها بغرفتها فشعرت بالقلق ودخلت غرفة كريم مسرعه لتجد نور نائمه بهدوء بجوار كريم فتبتسم ابتسامه هادئه فيستريح قلبها وخرجت لتتركهم نائمين هكذا وبعد قليل ايقظ المنبه كريم ونور بالطبع مستيقظين في حاله كبيره من الخمول والملل والحزن ايضا ولكن كريم يحاول ان يقوي نفسه امام اخوته فجلسوا عالافطار وبرغم من عدم شهية كريم للطعام ولكنه تناوله حتي يفعلا نور وسمر مثله ولكن لم تقرب واحده منهم للطعام كريم باستغراب : ايه ده مينفعش كده هو انا هاكل لوحدي نور بملل : مش عايزه سمر : ولا انا كريم : خلاص انا كمان مش هاكل وهروح الشغل كده بقي ولما يجرالي حاجه ..... نور مقاطعه : لا لا بعد الشر خلاص هناكل اهو فابتسم كريم بلطف وبدأوا جميعا بتناول الطعام وبعد الانتهاء منه ودعهم كريم لضرورة ذهابه للعمل وفي مكان اخر لا نعرفه .......... : يوووه انا زهقت بقي من معاملتك دي يا عادل عادل : ده انا اللي زهقت انتي عيزاني اعملك ايه يعني دينا : مش عايزه منك حاجه انا نازله عادل : اتفضلي في غرفة سمر هاتفها يرن دينا : ايوه يا سمر .. سمر انا بجد زهقت سمر : لازم تتحملي مش ده اختيارك دينا : اعمل ايه بس لما اتجوزته اتغيرت كل افكاري نحيته وهو كمان اتغير سمر : ياما نصحتك وقولتلك انه فيه صفات كتير وحشه وهتضايقك في الجواز وكنتي بتقوليلي لا سيبيني اصلي بحبه وياما قولتلك الحب بيعمي الانسان عن انه يكتشف حاجات كتير وحشه في حبيبه بيكتشفها بعد الجواز لانه بيعاشر حبيبه ده لوقت اطول ياما قولتلك تركني حبك علي جمب وتفكري عشان ده اختيار هيلازمك عمرك كله دينا : وايه الحل سمر : لو حياتك جحيم اوي كده اطلبي الطلاق دينا : ايه طلاق ؟ بس انا عمري ما فكرت في كده سمر : ليه بقي .. طلاما مفيش بينك وبينه عيال يبقي خلاص عادي دينا بألم : فعلا مفيش بيني وبينه اطفال بس فيه بيني وبينه .... سمر مقاطعه : متقوليليش زفت حب ما خلاص بقي كفايه حب طلاما الصفات السيئه هي الاغلبيه يبقي مفيش حب دينا بتفكير : مقدرش اطلب منه الطلاق يا سمر لاني برغم كل الوحش اللي فيه بس ماتخيلش حياتي من غيره سمر : يوووه خلاص يا دينا انتي حره بس ماترجعيش تشتكيلي دينا : اعمل ايه ماهو انتي صحبتي وبنت عمي هفضفض لمين غيرك سمر : مممم طيب يا ستي ماتزعليش بقي وفكي كده دينا : ماشي نور بقيت عامله ايه دلوقتي سمر : الحمد لله ربنا معوضها بكريم بقيت متعلقه بيه اوي دينا : ربنا يخليهولكم سمر : يارب دينا : يلا يا سوسو باي باي سمر : باي اما عند كريم بالعمل في مكتبه يدخل احدهم ادهم : صباح الخير كريم : صباح النور ادهم : فيه انسه بره عايزه تدخل بس مرضيتش تبلغني باسمها كريم باستغراب : مممممم طب خليها تتفضل وبعد دخول تلك الفتاه واغلاق الباب خلفها رفع كريم وجهه ليعرف من هي تلك كريم بدهشه : ساره ساره : ايوه ساره كريم قاضب حاجبيه : اتفضلي ساره باحراج : انا عارفه ان باباك اتوفي البقاء لله كريم : البقاء لله وحده ساره : كريم انا عايزه اتكلم معاك كريم بحزم : ساره لو هتتكلمي في اي موضوع انتي فهماه فا بلاش احسن ساره بدموع : لا يا كريم مش بلاش انا لازم اتكلم لم يرد كريم ساره بدموع : كريم انا بقالي 3 سنين ماشوفتكش وانا عارفه انك حاولت توصلي ومعرفتش بس اعمل ايه الضغوط اللي كانت عليا وقفتني في مكاني انا عملت المستحيل عشان علاقتنا تكمل وانت فاهم كده كويس بس برضو مكانش فيه فايده كريم : المشكله كبيره يا ساره انا ماخبتش حاجه علي اهلك وروحت قولتلهم انا بحب بنتكم ساره مقاطعه : وهما مغلطوش هما كانوا متقبلينك جدا بس حطولنا حدود والحدود ديه احنا مالتزمناش بيها واحنا اللي ضيعنا بعض كريم : يعني ايه حدود .. حدودهم اننا منتكلمش غير مره في اليوم ولما غلطنا وزودنا المره ديه يبقي منتكلمش خالص لحد مانتعاقب ولما نتعلم من غلطتنا نرجع نتكلم تاني مين يستحمل كده .. ده احنا كنا بننام علي صوت بعض وبنصحي علي صوت بعض ساره : كان لازم تقدر انهم خايفين عليا وخايفين علي منظري قدامك وقدام اهلك لما نفضل نتكلم كتير كده ومفيش بينا اي حاجه رسمي وخايفين لاحسن السنه تضيع عليا من عمري وكان لازم تبقي عارف ان احنا الاتنين غلطنا انا غلطت لما زودت معاك في الكلام وسيبت ماما بتنادي عليا ومردتش عليها عشان افضل اتكلم معاك وماعملتلهاش احترام اي حد في مكانها كان هيضايق من طريقتي وانت سامع انها مضايقه ومكمل معايا في الكلام احنا كنا مراهقين فعلا وبنعمل غلط في غلط اسلوبنا كان زفت في كل حاجه لحد ما باباك زهق من طريقتك وانا كمان اهلي اتخنقوا من طريقتي وبعدونا علي بعض كان حقهم يعملوا كده الغلط كان علينا احنا كريم بتأفأف : ساره هتفضلي لحد امتي في صفهم ساره : انا مش في صف حد يا كريم انا مع الحق بجد .. كريم انت مبتفكرش انا عملت ايه عشانك انا كنت بتهان منهم وبتهزق دايما وبدافع عنك علي طول وبرغم كل السنين اللي فاتت واحنا بعيد عن بعض بس انت كنت عايش جوايا .. بجد كنت معايا دايما عشان انت انسان ميتعوضش كريم : صعب يا ساره صعب انا كمان اتبهدلت في علاقتنا ديه واذا كانت هتعملنا مشاكل فا بلاش منها احسن خليكي في حالك زي ماكنتي وانا يا ستي في حالي ساره بدموع : انت شايف كده بجد كريم متهربا : ايوه ساره وقد همت بالوقوف : ماشي يا كريم براحتك بس انت عمرك ما هتلاقي واحده تحبك زيي ولا تفضل باقيه عليك العمر ده كله وبعد خروج ساره من المكتب كريم بداخله : عارف اني عمري ما هلاقي زيك وقد ايه قلبي اتخطف لما شوفتك وتعبت اوي عشان اداري لمعة عينيا عشان متعرفيش انك وحشاني بس انتي اللي بعدتي وسيبتيني مش عارف كنتي صح ولا غلط لانك سيبتيني عشان اهلك تعبوا اوي وسطينا واحنا كمان تعبنا .. انا بجد مش عارف وفي غرفة سمر يرن هاتفها .. ..... : الو يا سمر انا دعاء سمر : دعاء ازيك عامله ايه يا حبيبتي دعاء : الحمد لله يا حبيبتي البقاء لله سمر : ربنا يخليكي يا دعاء شكرا دعاء : لا يا حبيبتي ماتقوليش كده سمر : طمنيني عليكي دعاء : انا سافرت فرنسا سمر بتفكير : والله اشمعنا دعاء : جالي شغل هناك وانتي عارفه ان جدتي عايشه هناك فا قولت استقر بقي سمر : اه ربنا معاكي يا حبيبتي دعاء : ومعايا واحده ربنا يكرمها وقفت جمبي كتير سمر : طب الحمد لله يا دودو دعاء : ثواني يا سمر ... ايوه يا سميره سمر باستغراب : ........... دعاء : ايوه يا سمر معلش كنت برد عليها بس سمر : هي اسمها سميره دعاء : اه .. ايه مالك سمر : لا لا يا دودو مفيش دعاء : ماشي يا توته يلا اسيبك انا بقي باي باي سمر : باي وفي مكان اخر تجلس سيده بغرفتها ويرن هاتفها المتصل : الو .. مدام سميره سميره : ايوه المتصل : فيه خبر لحضرتك .. البقاء لله زوجك اتوفي في مصر امبارح سميره : حضرتك متأكد المتصل : ايوه يا فندم سميره : متشكره .. مع السلامه وانتهت الحلقه وانتظروا باقي الاحداث علي نار هادئه مـــريمــ |
رد: روايتي الثانيه ...( في خطوتك .. سكتي)
مبدعه كالعاده مش جديد عليكى والروايا شكله كدا روعه ع الاخر بالتوفيق ليكى حبيبتى بالنسبه للتوقع انتى عارفه انى خبيره قديمه بس مش اوى يعنى ههه ممكن تكون مامتهم سيباهم ومتجوزه واحد تانى والله اعلم مستنياكى حبيبتى على نار بس ادعيلى النت مايفصلش عندى اصل جوزى اتاخر الشهر ده فى دفع الفاتوره هههههههههه |
رد: روايتي الثانيه ...( في خطوتك .. سكتي)
اقتباس:
هههههههههه حبيبتي يا امولتي وحشني كلامك ده والله وخفة دمك ربنا معاكي يارب والله الايام دي كلنا عندنا أزمه في النت ربنا يستر:224: |
رد: روايتي الثانيه ...( في خطوتك .. سكتي)
رووووعة حبيبتي رواية ممتعة وانا متبعاكي ان شاء الله
ويارب يوفقك ويفرحك بالنجاح |
رد: روايتي الثانيه ...( في خطوتك .. سكتي)
اقتباس:
تسلميلي يا روزتي :0453: |
رد: روايتي الثانيه ...( في خطوتك .. سكتي)
رووووووووووعة بس ليه وقفتي عند الجزء دة بالذات ؟ كملي لازم أعرف اللي هيحصل أنا متشوقة جدا يلا كملي دلوقتي ملكيش عذر أنا عايزة الحلقة الجديدة حالا متنسيش تبعتيلي الحلقة الجديدة |
رد: روايتي الثانيه ...( في خطوتك .. سكتي)
اقتباس:
عيوني حاضر :227: |
رد: روايتي الثانيه ...( في خطوتك .. سكتي)
وعاد كريم الي المنزل وتناولوا الغذاء وجلسوا سويا كريم : مالك يا سمر سمر بشرود : ممم كريم انا هقولك مالي بس ارجوك ماتتعصبش كريم : هااا سمر : هي ماما .. اقصد سميره .. عايشه في فرنسا صح كريم بعصبيه : انا مش قولت السيره ديه متفتحيهاش اصلااا وكمان قدام نور نور باستغراب : ليه .. ليه يعني ماتفتحهاش وخصوصا قدام نور هفضل لحد امتي معرفش فين امي ولا اعرف عنها حاجه كريم بعصبيه : شوفتي يا هانم اخرتها ايه ... مفيش حاجه يا نور ادخلي اوضتك دلوقتي نور : لا يا كريم مش داخله غير لما اعرف كل حاجه كريم بعصبيه : وانا قولت ادخلي سامعه دخلت نور غرفتها بخوف ودموع كريم : سمر انا قولت قبل كده مليون مره وحزرتك من الكلام في الموضوع ده سمر بدموع : مانا كمان عايزه اعرف يا كريم اي حاجه عنها عندي فضول يا اخي كريم : انا مش هتكلم في الموضوع ده خالص وعايشه في فرنسا يا ستي وبعدين انتي ايه اللي خلاكي تفتكري اصلا سمر : واحده صحبتي النهارده اتصلت وقالتلي انها في فرنسا وفيه واحده بتساعدها اسمها سميره فا الموضوع اتولد جوايا تاني كريم : طيب لو سمحتي انسيه واطرديه من دماغك دلوقتي لحد ما اشوف هعرف اهدي نور ولا لا وانتي عارفه انها مش ناقصه كفايه اللي هي فيه ومقاومتها في ضياع بابا منها سمر : ماشي وترك كريم سمر ودخل لنور وجدها تبكي بشده فألمه قلبه عليها حقا كان قاسي عليها جدا كريم : نور .. نور اهدي انا اسف تبكي نور ولم ترد عليه فقام باحتضانها وتهدئتها كريم : عشان خاطري ماتزعليش انا والله خايف عليكي نور : كريم انت طول عمرك انت وبابا وسمر مفهمني ان ماما اتخطفت وانا صغيره ومتعرفوش عنها حاجه ومن كام سنه لما ابتديت اكبر وافهم قولتولي انها ماتت وانا ماقتنعتش بكده خالص وقولت يمكن كلامهم صح وحاولت اصدق انما اللي سمر قالته النهارده رجع الشكوك جوايا في ان امي عايشه كريم : نور الكلام ده ماسمعهوش علي لسانك تاني والسيره ديه متفتحيهاش قدامي مهما حصل نور : بس انا كريم : من غير بس انا ابوكي وامك واخوكي وكل حاجه اي حاجه محتجاها مني هديهالك حب وحنان وامان وكل حاجه ملك ليكي بس ارجوكي متفكريش في حاجه تتعبك ومتدوريش علي المشاكل زي اختك الطويله ديه نور مبتسمه : حاضر كريم بهدوء : حضرلك الخير نور : كريم كريم : نعم نور : انت كنت راجع من الشغل مضايق وباين علي وشك الخنقه ممكن اعرف ليه كريم : ممممممم هقولك .. فاكره كده من 3 سنين كنتي انتي عندك 12 سنه كنت بحكيلك علي بنوته جميله وكنت بحبها نور : اه فاكره طبعا وكان اسمها ساره كمان وكنت مغلبنا بالكلام معاها كريم : شطوره ذاكرتك حلوه نور : مالها بقي ساره كريم : انتي عارفه ان احنا بعدنا عن بعض وعارفه كمان انها لسه جوايا ومش عارف احب غيرها جات النهارده الشغل تعزيني في بابا الله يرحمه وتتكلم معايا في الماضي وتفهمني غلطتنا ومراهقتنا بس انا كنت هموت واخدها في حضني بس خبيت احساسي جوايا وبصراحه زعلتها وقولتلها خليكي في حالك وانا في حالي نور : ليه بس كده كريم : عشان مش عايز اسببلها مشاكل تاني نور : لا يا كريم خليك عاقل المشاكل ديه كانت زمان عشان كنتوا صغيرين كانت هي لسه في بداية الجامعه وانت كمان كنت في الجامعه مكانش ليك شغل ولا استقرار ولا حتي بيت ولا كان ينفع تتجوزوا اساسا انما دلوقتي يا حبيبي انت ليك شغلك وهي اتخرجت اكيد يعني دلوقتي مفيش مشاكل وانت تقدر تتجوز وتعيشها بطريقه كويسه كريم : ممممم بس مش قادر انسالها انها سابتني نور : بس هي لما سابتك سابتك عشان ابوها كان هيموت بسببك وبسببها وبسبب الطيش اللي كنتوا فيه سابتك علشان عيلتها مش عشان واحد تاني حبيته بالعكس ديه المفروض تكبر في نظرك كريم : انا تعبت اوي في بعدها عني نور : خلاص يا حبيبي يبقي تروح تتقدملها وش كريم : اتقدملها ايه يا نونو نور بابتسامه : وش يا كيمو كريم : هههههههههه حاضر بس قدام شويه نور : ماشي يا حبيبي وانا بقي اللي هاجي معاك واقولهم اني ولية امرك كريم : هههههههههه ماشي يا بطتي يلا بقي رييحي شويه نور : ماشي تصبح علي خير كريم : وانتي من اهله اما سمر في غرفتها تحدث نفسها سمر : انا فاكره كويس ان ماما سابتنا ومصعبناش عليها بس انا بجد مفتقده اوي كلمة امي ومفتقده حنان الام ونفسي اوي اعرف شكلها ايه وصوتها عامل ازاي .. انا لازم اعرف سميره اللي بتشتغل مع دعاء ديه هي امي ولا تشابه اسماء .. وانا هعرف اوصل لأمي بنفسي ولوحدي اما في منزل دينا دينا : عادل عادل : نعم دينا : عادل ممكن تخرجني عادل : اخرجك ليه هو انا فاضي دينا : ايوه انت فاضي مانت رجعت من الشغل وخلاص قاعد طول اليوم في البيت ايه اللي شاغلك يعني عادل : خارج مع صحابي دينا : بجد .. والله خارج مع صحابك يااااه فعلا مشغوليات ربنا يعينك عادل : يارب دينا : عادل انا مبهزرش انا اتخنقت بجد ومحتاجه اخرج عادل : اخرجي مع صحابك دينا : ده اللي ربنا قدرك عليه .. انا نفسي احس اني متجوزه بقي انت ليه عامل فيا كده عادل : عشان اتخنقت انتي دايما بتدوري عالمشاكل دينا ببكاء : بجد حرام عليك انا زهقت من حياتي وكرهت نفسي ومبقتش عارفه اعمل ايه انا تعبت بقي انت مفيش حاجه بتنفع معاك لو جبت الطيب من ناحيتي ميبقاش في فايده لو عاندتك برضو ميبقاش فيه فايده اعمل ايه تاني مبقتش عارفه كرهت الدنيا والناس كرهتني في اني يبقي عندي طفل يا اخي ده انا عملت علشانك حاجات كتير اوي وانت مبتفكرش تعمل علشاني الهوا حتي راحت في الرومانسيه والدلع بتاع زمان ولا هو الحب بينتهي بعد الجواز عادل بحزن : خلاص اهدي متعيطيش غصب عني اللي بعمله دينا : طب ليه بتعمله عادل : دينا انا تعبان انا بجد تعبان اوي الدنيا هي اللي بتقسيني عليكي والظروف دينا : ظروف ايه يا عادل ماحنا عايشين كويس وزي الفل ومفيش حاجه نقصانا عادل : لا يا دينا ناقصنا اهم حاجه ... الاطفال دينا بصدمه : هو ده بقي سبب معاملتك ديه عادل بدموع : غصب عني بجد انا اصلا بحبك اوي ومش متخيل حياتي من غيرك بس في نفس الوقت محتاج طفل والشيطان بقي بيهيألي اني لما اعاملك وحش كده هرتاح بس بالعكس انا بتعب اكتر دينا بدموع مثل الشلالات : انا مابتحبنيش يا عادل عادل : ليه بتقولي كده دينا : علشان اللي بيحب حد بيستحمل معاه اي ألم واي جرح زي مانت محروم من احساس الأبوه انا كمان محرومه من ألأمومه بس مش بأيدي ولا بأيدك واحنا حتي بقالنا كام سنه متجوزين عمرنا مافكرنا نروح نكشف عشان محدش فينا يجرح التاني يبقي كانت معاملتك بقي سببها انك حاسس ان العيب ناحيتي عادل : لا يا دينا ماتفهمينيش غلط عشان صارحتك .. كل الحكايه انه اضطراب نفسي بس استحمليني دينا ببكاء : وانا مين يستحملني يصمت عادل دينا : بص يا عادل اللي انت عايزه اعمله انا مش هعارضك في اي قرار ولو ماقررتش بسرعه هاضطر انا اللي اقرر عادل : مش فاهمك دينا : لا انت فاهمني .. تصبح علي خير اما عند سمر في غرفتها تفكر بالاتصال بصديقتها دعاء وان تحكي لها كل شئ سمر : ايوه يا دعاء دعاء : ايه يا سمر مال صوتك سمر : انتي نازله مصر امتي دعاء : مممم نازله اشوف جدو كده بعد بكره ان شاء الله سمر : طب ارجوكي لازم نتقابل ضروري دعاء : فيه ايه قلقتيني ماتسبنيش علي اعصابي كده سمر : مينفعش في التليفون لازم نتقابل دعاء : ماشي حاضر سمر : يلا توصلي بالسلامه باي دعاء : باي وفي صباح اليوم التالي في بيت دينا عادل : صباح الخير دينا بخمول : صباح النور عادل : ازيك دلوقتي دينا باستغراب : كويسه عادل : مالك دينا : ماليش .. ها قولي بقي وصلت لأيه عادل : ماوصلتش لحاجه دينا : يعني ايه عادل : يعني مقدرش دينا : متقدرش علي ايه عادل : مقدرش ابعد عنك دينا : ده الحل الوحيد عشان انت ترتاح عادل : مش هرتاح دينا : ازاي بقي اذا كنت تعبت وزهقت من العيشه معايا عادل : لا انا تعبت من الظروف دينا : الظروف ديه انا السبب فيها افهمني بقي روح اتجوز بنت تجبلك اولاد عادل : مش يمكن يكون العيب فيا انا دينا بصدمه : متقولش كده عادل بحزن : كل الاحتمالات موجوده دينا بدموع : بس انا عمري ما فكرت في كده سواء فيا ولا فيك مكانش بيهمني لاني ... عادل : لانك ايه دينا ببكاء : بحبك عادل ببكاء وهو يحتضنها : وانا كمان بحبك اوي .. بلاش تحطي قدامنا طريق الفراق عشان ده طريق وحش اوي ومالوش نهايه دينا : اذا كنت بفكر في كده فا ده علشانك مش علشاني عادل : لو فعلا بتفكري في مصلحتي يبقي بلاش تفكري في كده دينا : هحاول عادل : علشان خاطري دينا : حاضر وانتهت الحلقه انتظروا احداثا مشوقه علي نار هادئه مفيش توقعات النهارده مـــريمــ |
رد: روايتي الثانيه ...( في خطوتك .. سكتي)
حلقة جميييييييييلة جدا وشكرا إنك سمعتي كلامي ونزلتي حلقة جديدة أنا مش قادرة أجيب توقعات خالص الحاجة الوحيدة اللي أنا متوقعاها إن اللي قاعدة مع دعاء هي أم كريم وسمر ونور طولي الحلقات بقا ليه قصيرين ؟ هتنزلي الحلقة الجديدة إمتى ؟ |
رد: روايتي الثانيه ...( في خطوتك .. سكتي)
اقتباس:
تسلميلي يا قمرتي هطول الحلقات حاضر عينيا ليكي وان شاء الله لو لقيت تشجيعات حلوه كتير كده عالبارت ده هنزل الرابع النهارده علي بالليل كده لو مش لقيت بقي :06: هنزله بكره لعيونك |
رد: روايتي الثانيه ...( في خطوتك .. سكتي)
لا حبيبتي أكيد هتلاقي عشان بجد قصة حلوة جدا أكييييد هتلاقي تشجيعات كتير |
رد: روايتي الثانيه ...( في خطوتك .. سكتي)
اقتباس:
تسلمي يا قمرايه :228: |
رد: روايتي الثانيه ...( في خطوتك .. سكتي)
روعه كالعاده حبيبتى الاحداث شكلها هتولع يا معلم هههههه وانا من كتر الانتظار هولع قبلها ههه يسلمو ايديكى ياعسليه |
رد: روايتي الثانيه ...( في خطوتك .. سكتي)
اقتباس:
تسلميلي يارب مممواه :228: |
رد: روايتي الثانيه ...( في خطوتك .. سكتي)
رائع يا قمر تسلم ايدك
|
رد: روايتي الثانيه ...( في خطوتك .. سكتي)
وجعتى قلبى بجد
فى انتظار الحقة التانية |
رد: روايتي الثانيه ...( في خطوتك .. سكتي)
https://upload.3dlat.com/uploads/3dl...3999816751.gif
الله الله ايه الحلاوه دى يا ميرو يا قمر تسلم ايدك حبوبتى وبارتين مره واحده يادى الهنا يادى الهنا |
رد: روايتي الثانيه ...( في خطوتك .. سكتي)
جميلة جدا يا قمر تسلم ايدك |
رد: روايتي الثانيه ...( في خطوتك .. سكتي)
اقتباس:
تسلمي اقتباس:
سلامة قلبك تسلميلي اقتباس:
حبيبتي يا فرولتي مممواه بقي اقتباس:
تسلمي يا روحي |
رد: روايتي الثانيه ...( في خطوتك .. سكتي)
البارت الرابع ( خدعة شيطان ) https://upload.3dlat.com/uploads/3dl...4003143601.bmp ومرت اربع شهور وكريم يزداد شوقه نحو ساره ولكنه يتماسك لحتي يأتي الوقت المناسب ونور تتحسن حالتها بوجود اخيها اما سمر فقد اعتذرت صديقتها دعاء عن وصولها لمصر وانها ستغيب عن مصر وقت طويل لعملها الذي لا ينتهي فا قررت سمر عدم تبليغها حتي ان تأتي لمصر اما دينا وعادل فا الخناقات تقل بالتدريج لن اقول انها اختفت تماما بل علي وشك الاختفاء اما ساره فهي عندها امل كبير في رجوع كريم اليها وسميره تلك لم نعرف عنها الكثير حتي الان وفي بيت كريم تدخل نور لسمر غرفتها نور : انا عايزه احكيلك علي حاجه بس توعديني انك ماتقوليش لكريم سمر : مقدرش اوعدك غير لما اعرف ايه هي الحاجه ديه نور : ماشي بصي يا سمر من غير اي مقدمات .. انا بحب سمر : نعم نور : ايوه يا سمر بحب مالك استغربتي كده ليه سمر : يعني ايه بتحبي عرفتيه منين ده وامتي نور : انتي عارفه اني بحب اقعد عالنت كتير يا ستي اتكلمت معاه وحسيت بشعور ناحيته كده سمر : اااه عشان كده الايام اللي فاتت بقيتي بتطولي اوي قدام النت نور : اصلي اتعودت علي وجوده سمر : نور انتي بتستهبلي انتي عارفه انتي عندك كام سنه نور : عندي 16 سمر : لسه مقفلتيهومش كمان يعني يا هانم 15 سنه يعني عيله نور : لا يا سمر مش عيله انا فهمه كويس اوي انا بعمل ايه وبعدين انا مبغلطش سمر : في الاول مش بنغلط انما لما بنغوط اوي في الحب ده بتلاقي الغلطات من حيث لا تدري نور : سمر خليكي واثقه فيا سمر : مقدرش اثق فيكي عارفه ليه لانك متوتره نفسيا دلوقتي ومعندكيش استقرار نفسي ولا نضوج عقلي وبعدين انتي ايه اللي خلاكي تحبي وتدوري علي حد يهتم بيكي اومال كريم بيعمل ايه نور : سمر ماتستهبليش عشان انتي عارفه كويس اوي ان كريم بقاله فتره كبيره بعيد عني وشغله اخده مني وحاجات كتير في تفكيره واخداه مني وبطل يتكلم معايا زي الاول سمر : وديه جزاته بقي انك تحبي وكمان من وراه نور : مقدرش اقوله لاني عارفه انه هيرفض سمر : لازم يرفض لان دايما الغلط اللي بيترفض عمر الحاجه الصح ماتترفض ابدا .. بس تعاليلي هنا البيه اسمه ايه بقي وكام سنه وايه النظام يعني نور : اسمه يوسف وعايش في القاهره بس اهل مامته هنا في اسكندريه وبييجي من الوقت للتاني وعنده 18 سنه سمر : يعني عيل برضو زيه زيك .. وياتري تعليمه ايه نور : ثانويه سمر : ثانويه ايه يعني علمي ولا صنايع ولا ايه بالظبط نور : بصراحه صنايع سمر : بتهرجي نور : لا مش بهرج وبعدين فيها ايه لما يبقي صنايع مالهم بتوع صنايع سمر : والله متعرفيش مالهم حضرتك ده لازم يتعب جدااا عشان يجيب مجموع ويدخل كليه كويس نور : مانا عارفه والله هو بيعمل اللي عليه سمر : نور انتي بتحبيه اوي كده نور : ده احساسي اتعودت عليه اوي بجد هو اعترفلي من اسبوع وانا قولتلو نفس شعوري امبارح سمر : ممممممممم نور : فيه طلب بقي كده .... عايز ياخد رقم موبايلي سمر : لا يا حبيبتي مستحيل بقي نور : ليه مستحيل كريم علي طول بره وانتي وخلاص عرفتي وانا في اجازتي فيها ايه بقي وبعدين حتي لو كريم هنا هتكلم معاه علي انه صحبتي سمر : لا يا نور ماتحاوليش تقنعيني وكمان عايزه تكدبي علي كريم يعني مش تخبي عليه وبس نور : ماتكبريش الموضوع بقي وعلشان خاطري ارجوكي توافقي سمر : بصي انا عارفه اني لو رفضت انتي هتعملي من ورايا لانك عنديه وبتمشي اللي في دماغك فا انا هوافق وخليني ورا الكداب لباب الدار بس والله يا سمر لو حسيت بأفوره هضايق جدا نور : لا متقلقيش هو اصلا من عيله محترمه والله عنده اخت خريجة هندسه واخ صغير سمر : لما اخته خريجة هندسه مطلعلهاش ليه نور : عشان عارف ان اخته تعبت اوي في الكليه والثانويه كمان وان بيقول الصنايع ليها مميزات سمر : طيب ربنا معاه يمكن يطلع كويس ويفضل معاكي محترم لحد ماتدخلي الجامعه ويبقي ييجي يخطب نور : يارب سمر : ممممم انا مش مرتاحه نور : لا عشان خاطري ارتاحي هو مؤدب اوي والله وكان عايز يكلمك اول ما اديله رقمي واكلمه علي طول هتلاقيني بخليه يكلمك سمر : طيب يا ستي نور : شكرا يا سمورتي يلا باااي هروح اوضتي بقي سمر : ماشي وبعد خروج نور .. تقول سمر بداخلها سمر : قد ايه احنا محتاجين لماما ديه بجد انا كمان مش عارفه ابقي مسئوله لوحدي كده ومبعرفش اخد قرارات يارب الاقيها اما في غرفة نور نور : الو يوسف معايا يوسف : ايه يا نور انتي بتتكلمي في لجنه نور بضحك : هههههههههه انت عرفتني منين اصلا يوسف : احساسي نور : ممممممممم يوسف : لا بس عجبتني يوسف معايا ديه نور : ممم لازم تراعي انها اول مره بقي يوسف : والله انا مراعي يا ستي نور : بس صوتك مش لايق علي صورك خاالص يوسف : لا والله ليه بقي تخين ولا رفيع نور : بصراحه صغيور اوي يوسف : يا سلام نور : ههههههههه اه والله يوسف : ماشي ماشي وانتي صوتك تخين علي فكره نور : انااا لا لا كده بقي مينفعش ديه غلطتي يعني اني كلمتك يوسف : لا طبعا مش غلطتك ولا حاجه وهتعرفي ده بعدين نور : اوكيه .. يلا بقي كفايه كده عايز حاجه يوسف : ايه ماتخليكي شويه نور : الايام جايه كتير يوسف : خلاص ماشي تصبحي علي خير نور : وانت من اهله وهكذا انتهت المكالمه الاولي اما عند كريم يمسك هاتفهه ويبحث بالاسماء عن رقم مهم من اجل العمل واثناء البحث يري رقم بجواره اسم ( ساره ) ويقول بداخله كريم : ياااه لسه معايا الرقم ده عمري مافكرت امسحه كان عندي امل كبير في اننا نرجع .... نفسي اسمع صوتها اوي فيأتي في باله كلام نور ( طلاما تعبت في بعدها يبقي تروح تتقدملها ) كريم : انا هكلمها وأمري لله وبغرفة ساره تجلس وتنزل دموعها لتتذكر اجمل ايامها مع كريم واثناء تلك اللحظه يرن هاتفها ليعلن اسم كريم فيدق قلبها بشده وتتخيل انها تحلم فهذا الرقم لن يتصل بها منذ 3 سنوات لم تصدق ما يحدث ولكنها جمعت اعصابها وقوتها وقالت ساره : الو كريم : عارف انك مامستحيش الرقم ساره : وعرفت منين كريم : احساسي ساره : هو انت لسه بتحس بيا يصمت كريم ساره : انت نمت كريم مبتسما : لا موجود ساره : وليه ساكت كريم : علشان فرحان اوي .. واحساسي ده بقالي 3 سنين ماحستش بيه تصمت ساره كريم : وانتي سكتي ليه ساره : علشان انا كمان فرحانه اوي واحساسي ده بقالي 3 سنين ماحستش بيه كريم ضاحكا : وحشتيني ساره مبتسمه ويرقص قلبها : وانت كمان وحشتني اوي كريم : ساره انا دلوقتي في كامل الاستعداد اني اجي اطلبك من باباكي واعتقد ان مش هيبقي عنده مانع ساره : اايوه وايه اللي هيخليه يرفض بس احنا كنا عيال انما دلوقتي بقينا شباب وفاهمين احنا بنعمل ايه كريم ممازحا : ممممم طب سيبيني افكر ساره : والله طيب فكر براحتك وماتجيش بقي كريم ضاحكا : يا بنتي بهزر خلاص اهدي ساره مبتسمه : طويب كريم : يالهوي علي طويب ديه .. ماتغيرتيش خالص كده ساره : لا وانت كمان ماتغيرتش لو كنت انت اتغيرت كنت هتلاقيني انا كمان اتغيرت كريم : ماشي يا سوسو شوفيلنا بقي كده ميعاد مع بابا وبلغيني ساره بفرحه : حاضر كريم : يلا عايزه حاجه ساره : ها كريم : اه مش عايزه اوكيه يلا باي ساره بملل : باي كريم ضاحكا : استني بحبك ساره : يااااه وانا كمان بحبك كريم : يلا باي باي ساره : باي باي واغلق كريم الاتصال وسعادته لا توصف اما عند سمر فا تتصل بها دعاء دعاء : سمر انا جايه بكره سمر بفرحه : بجد دعاء : ايوه سمر : طب قوليلي هي المدام اللي بتساعدك ديه هتيجي معاكي دعاء : لا هتفضل هنا ... ليه بتسألي سمر : لا ابدا كان قصدي اطمأن عليكي بس دعاء : لا اطمني متقلقيش المهم لما اوصل اكيد هكلمك علشان نتقابل لانك شغلاني سمر : خلاص اوكيه دعاء : يلا باي باي سمر : باي اما عند عادل فهو يفكر في الذهاب لوالد دينا حتي يتحدث معه ويخرج ما به من الم فهو رجل مثله ويمكن ان يتفهم موقفه وخصوصا ان والد عادل متوفي ولكن لماذا فكر عادل في الذهاب الان ياتري عن اي شئ سيتحدث معه ياسين ( والد دينا ) : مالك يا ابني عادل : عمي انا جاي اتكلم معاك وعايزك تفهمني ياسين : اتكلم عادل : انا بجد بحب دينا اوي اكتر من روحي بس في نفس الوقت هموت ويبقالي طفل ياسين : يا ابني الكلام ده مش بايدها ولا بايدك ولا بايدي انا ده بايد ربنا سبحانه وتعالي عادل : انا فاهم يا عمي بس لازم نسعي انشالله حتي نشوف علاج ياسين : علاج لمين يا ابني هو انت تعرف العيب فيك ولا فيها عادل : منعرفش واستحاله دينا توافق انها تروح لدكتور ياسين : خلاص يبقي روح انت لوحدك من غير ما هي تعرف واتاكد من نفسك عادل بتوتر : نعم ياسين : ايوه يا ابني ولا هي كلمة الحق بتزعل ولا انت كنت عايز دينا اللي تكشف وانت لا عادل : لا يا عمي والله الحكايه مش كده ياسين : خلاص طلاما مش كده يبقي تروح وتطمني عادل : حاضر يا عمي .. عايز مني حاجه ياسين : سلامتك عادل : مع السلامه ياسين : سلام وبالفعل خرج عادل ويقرر ان يذهب لاخيه الطبيب حتي يتمم اجراء الكشف فيذهب الي المستشفي لأخيه عادل : ازيك يا ياسر ياسر : في ايه مالك عادل : من غير لف ولا دوران انت اخويا وانت الوحيد اللي تقدر تقولي العيب من ناحية الاطفال فيا ولا لا ياسر بدهشه : انت متاكد من كلامك ده عادل : ايوه وياريت دلوقتي ياسر بتفكير : اكيد العيب في دينا يا ابني عادل باستغراب : ليه بتقول كده ياسر : علشان انا اخوك وعندي ولد وبنت واختك اللي عايشه بره ديه ليها تلاته اما بقي دينا وحيده فا اكيد العيب ناحيتها عادل : لا متقولش كده محدش عارف وكلامك ده مش دليل ارجوك ريحني واسمع الكلام ياسر بتفكير : طيب اتفضل وبعد اجراء الكشف ومرور ساعات عادل : ها طمني ياسر : زي ماقولتلك انت زي الفل عادل بسعاده : انت متأكد ياسر : ايوه يا ابني الورق في ايدي اهو عادل : متشكر يا عادل ياسر بخبث : لا علي ايه بس ده شغلي اما عادل خرج من عند ياسر وهو بكامل سعادته ولكنه كلما يفكر بدينا يتألم ويتذكر وجهها عندما تعلم ان العيب منها ولكنه عاد مسرعا لبيت ياسين ياسين : انت متأكد من كلامك عادل : ايوه يا عمي والورق اهو ياسين : طيب يا ابني ربنا يوفقك عادل بحزن : انا مش عارف اعمل ايه ياسين : طلاما انت عرفت انك كويس يبقي بلاش تجرحها وتأذيها معاك طلقها يا ابني وروح لحالك عادل بصدمه : لا يا عمي ارجوك ماتقولش كده انا ماقدرش اطلقها ياسين : وليه روحت عملت التحليل ده لما انت بتحبها اوي كده عادل بتفكير : علشان .. هتعرف بعدين .. بس كل اللي عايزك تتاكد منه اني بحبها ومقدرش اسيبها انا بجد مريض بيها ياسين : ماشي يا ابني ربنا يسهلك بس عايزك تعرف اي تفكير انت هتفكر فيه ممكن يجرح او يأذي بنتي صدقني هتشوف مني وجه مش كويس عادل : لا يا عمي ماتقلقش .. المهم ياريت لما حماتي تسأل حضرتك انا كنت قاعد معاك ليه قولها شغل بلاش تعرف اللي بيني وبين حضرتك ياسين : ماتقلقش عادل : يلا مع السلامه اشوف حضرتك علي خير ياسين : الله يسلمك وذهب عادل الي بيته يفكر في ماذا سيفعل لم يستطيع ان يجرح دينا وايضا لن يستطيع ان يتحمل عدم وجود طفل له في الدنيا يحمل اسمه ويرعاه عندما يكبر .. ولكنه قرر انه سيفعل المستحيل لعدم أشعار دينا بما فعله او بحزنه ويأسه عادل : دودو يا دودو دينا باستغراب : عادل انت جيت عادل : ايوه حبيبتي وحشتيني دينا بدهشه : ها عادل : ايه بس مالك فيها ايه لما ادلع مراتي حبيبتي دينا : عادل حبيبي انت تعبان اجيبلك دوا عادل : كفايه هزار بقي يا لمضه ويلا قومي علشان اخرجك دينا : هحاول اصدق اني مابحلمش عادل : صدقي ويلا البسي دينا بسعاده : حاضر وانتــــهت الحلقه انتظروني مــريمــ :0451: مراعاة لمشاعري الخاصه وشكرا لا أحل لا احد ابدا ان يقتبس الروايه او جزء منها حتي ولو بأسمي |
رد: روايتي الثانيه ...( في خطوتك .. سكتي)
روووووووووووعة حبيبتي مبدعة كالعادة مش عارفة ليه حاسة إن سميرة دي هترجع مع دعاء وهتطلع هي أمهم يلا هنشوف في الحلقات الجاية م تعملي زي إمبارح وتزودي حلقة >>> طمآعة أنا ههههه بإنتظارك |
رد: روايتي الثانيه ...( في خطوتك .. سكتي)
اقتباس:
حبيبتي تسلميلي البارت الخامس ان شاء الله بالليل بعد التشجيعات :13: |
رد: روايتي الثانيه ...( في خطوتك .. سكتي)
ممتاز حبيتى اسلوبك مشوق وجميل حاسة ان ياسر كذب على اخوة مع انة دكتور وفى صدمة مستنية دينا المسكينة منتظرة الجزء الجديد بكل شوق |
رد: روايتي الثانيه ...( في خطوتك .. سكتي)
اقتباس:
تسلميلي :0451: يا قمرايه |
رد: روايتي الثانيه ...( في خطوتك .. سكتي)
رووووووعة ياقمر مستنين الجزء الخامس
وانا كمان متوقعة ان ياسر بيكذب وان العيب من عادل |
رد: روايتي الثانيه ...( في خطوتك .. سكتي)
روووووووووووووووووووووعة بجد وكل يوم بتشوقينى للحلقة الى وراها
|
رد: روايتي الثانيه ...( في خطوتك .. سكتي)
اقتباس:
تسلميلي اقتباس:
تسلمي يا قمرايه |
رد: روايتي الثانيه ...( في خطوتك .. سكتي)
جميل جميل ياقمر
يالا استمرى اكتر من روعه ياواد يا رومانسى هههههههههههه احلى حاجه كلهم بيحبو وبيحبو بجديعنى مش هزار ربنا يوفق الجميع واحنا كمان معاهم ههههههههههههه |
رد: روايتي الثانيه ...( في خطوتك .. سكتي)
اقتباس:
حبيبتي تسلمي |
رد: روايتي الثانيه ...( في خطوتك .. سكتي)
حلوه جدا يا مريم انتى كاتبه ممتازه ماشاء الله:30:
|
رد: روايتي الثانيه ...( في خطوتك .. سكتي)
:227:بجد البارت التانى جميل جدا انا كل ما اقرأ واحد اشتاق انى اشوف التانى
|
رد: روايتي الثانيه ...( في خطوتك .. سكتي)
ليه كده لا اكتبى باقى الحلقات انا متشوقه اعرف الباقى جدا ولان كل حلقه تحفه وبذات البارت التالت حلو كتير :0453:
|
رد: روايتي الثانيه ...( في خطوتك .. سكتي)
جميل جدا انا متشوقه للحلقات الجايه مش عارفه ليه حاسه انو حيحصل فراق بين دينا وعادل وبعد كده هيرجعوا لبعض
|
| الساعة الآن 04:20 AM |