حد فاهم حاجة؟

"سمك.. لبن.. تمرهندي!" عبارة شهيرة من الفلكلور الشعبي المصري، نقولها عند رؤية أشياء عديدة غير متناسقة يصعب ربطها ببعضها، ولعل هذه العبارة هي الأقرب للوضع الذي نعيشه الآن..

حيث نعيش حالة من التوهان العام، ولخبطة الأوراق، فما هو صحيح اليوم خطأ غدا، وما هو مستحيل أن يحدث يصبح أمرا واقعا لابد أن نسلم به، فصرنا "مش عارفين راسنا من رجلينا"

وأصبح السؤال الوحيد المنطقي الآن هو: حد فاهم حاجة؟!

الانتخابات: واحد يطلع يقولك لو اتطبق قانون العزل يبقى الانتخابات هتتعاد من أول وجديد بين الـ 12 مرشح، وده معناه إننا هنرجع تاني لنقطة الصفر، ويرد عليه واحد تاني ويقول لأ الانتخابات مش هتتعاد، واللي هيحصل إنهم هيعملوا استفتاء على مرسي لو أخذ 50(%+ا) في الاستفتاء يفوز برئاسة مصر.. حد فاهم حاجة؟!

طيب لو اتطبق قانون العزل على شفيق والانتخابات اتعادت المجلس العسكري هيكون موقفه إيه؟، ياترى هيسلم السلطة في الميعاد المحدد ولا هيمد الفترة الانتقالية لحد ما ييجي رئيس، طيب لو هيسلمها في ميعادها هيسلمها لمين؟.. حد فاهم حاجة؟!

طيب هتعمل إيه لو عرفت إن قانون العزل إلى الآن لم يتم معرفة مدى إمكانية تطبيقه؟، وإن المحكمة الدستورية أعلنت أنها غير مختصة في النظر في هذه القضية، يعني لحد دلوقتي مش عارفين مين اللي هيحكم بدستوريته من عدمها، ويزداد الأمر تعقيدا لو افترضنا إن قانون العزل ممكن يطبق لكن بعد فوز شفيق بالرئاسة، تفتكر إيه اللي هيحصل؟، هنعزل شفيق فعلا ونعيد الانتخابات تاني من الأول، ولا هنعمل مش واخدين بالنا ونقول كلها 4 سنين ويمشي؟.. حد فاهم حاجة؟!

بافتراض إن قانون العزل لم يطبق وظل الحال على ما هو عليه هنعمل إيه في الإعادة؟، والدك يقولك تدي صوتك لشفيق ده هيرجع الأمن وعنده خبرة كبيرة في إدارة البلد، غير كده هيحافظ على مدنية الدولة، وفي نفس الوقت هتلاقي أخوك بيقولك إوعي تدي لشفيق دم الشهداء في رقبتك ده فلول، وواحد تاني يقول إحنا خايفين ليه من الإخوان هيخلوها دينية طب وإيه يعني هو الدين وحش، وييجي واحد رابع ويقول لأ أحسن حل نقاطع الانتخابات.. وفي الحالة دى قدامك سؤال هتقاطع الانتخابات ولا هتبطل صوتك؟، ويقنعك بإنك لو قاطعت الانتخابات ممكن صوتك يتزور، لكن لو نزلت وأبطلته يبقى أحسن، ويطرح عليك سؤال أكثر سذاجة هتبطل صوتك إزاي؟ هتعمل علامة على الاتنين ولا هتكتب اسم مرشحك اللي سقط في الجولة الأولى ولا هتعمل إيه؟.. حد فاهم حاجة؟!

خلاص انتخبنا الرئيس ودخل قصر الرئاسة وفجأة نكتشف وهو يؤدي القسم إن الدستور لم يكتب واختصاصات الرئيس لم تحدد، لأن ببساطة اتفقنا إننا لا نتفق على أعضاء اللجنة التأسيسية لوضع الدستور، فما بالكم بمواد الدستور، لذا فمن المنطقي أن يكون قسم الرئيس القادم: " أقسم بالله العظيم أن أحافظ على النظام الجمهوري إذا فضل، وأن أحترم الدستور لما يكتبوه، والقانون لما أبقى أعرفه".. حد فاهم حاجة؟!