الطرازات المختلفه للاثاث

إزاى نعرف نفرّق بين الطرازات المختلفة للأثاث وإحنا بنشتري؟
فيه أنواع من الطرازات الأساسية في الديكور؛ زي: الطراز الإسلامي، والفرنسي، والكلاسيكي والإنجليزي، والصيني، والمنتشر جدا دلوقتي هو الطراز النيوكلاسيك.

لكن نقدر نفرّق بينهم بأشياء بسيطة؛ فمثلا:
الطراز الفرنسي: بيتمثل في الصالونات اللي بتكون فيها أويمات صغيرة، وقاعدة الأثاث بتكون عبارة عن شجرة ملفوفة.

الطراز الإنجليزي: بيميل إلى استخدام كتل الخشب الضخمة في الشكل واللون، وبيكون الخشب طاغي على الفرش والتنجيد.

الطراز الياباني: بيكون الأثاث ارتفاعاته قصيرة، أقصى ارتفاع مثلا لكنبة الأنتريه بيكون 10 سم، والأثاث بيكون عبارة عن أشكال هندسية زي المربعات والمثلثات.

الطراز الإسلامي: بيتماشى معاه الغرف الديوانية؛ اللي بتكون عبارة عن: مصاطب، وسيراميك أندلسي، وبوفات، وشِلت، وترابيزات كبيرة، وهو بيكون قريب جدا من التراث البيئي المصري اللي بيكون داخل فيه الأرابيسك.

الخدادية ممكن تحول الكنبة من مودرن لكلاسيك



إيه اللي بيميز الأثاث والخشب التركي اللي بقى يجذب ناس كتير دلوقتي؟
الأثاث التركي بيحتوي على خشب مستورد، وبيكون أرخص من الخشب الطبيعي، وبيمتاز الأثاث التركي بقوة وجمال وليونة في المفصلات اللي بتكون جزء أساسي من الأثاث، وبتساعد على استمراره فترة من الزمن.

طيب والأثاث النيوكلاسيك بيتميز بإيه؟
الأثاث النيوكلاسيك بيجمع بين الشكل والخطوط البسيطة والعملية، مع الاحتفاظ بأصول الطرازات المختلفة من خلال كتابات مبسّطة على الحوائط أو التنجيد أو الإكسسوارات المحيطة بالأثاث؛ يعني الأثاث بيكون بسيط وفي نفس الوقت محتفظ بقيمته وملامحه الكلاسيكية.

إزاي أخلّي للأثاث أو الديكور روح وطراز معين؟
ممكن أضيف للأثاث طراز معين عن طريق اللعب بالفرش والألوان والأقمشة اللي باستخدمها؛ بإني أضيف شكل بسيط أو أويمة.

وكمان الأقمشة المنتشرة دلوقتي بيكون عليها نقشات مبسطة من طرازات مختلفة؛ زي: الباروك الفرنسي والإسلامي، وبتكون بألوان مبهجة، بالإضافة كمان إلى الخداديات المصنوعة من الفايبر الخفيف اللي بتزيد من قيمة الفرش؛ لأن "الكوشنز" أو الخدادية بتغير من شكل الكنبة؛ خاصة لما تتصمم من أقمشة قطيفة وساتان مطرّز وقماش عادي جنب بعض، واللي بتحوّل الكنبة من المودرن إلى الكلاسيك، وهو ده النيوكلاسيك.

هل نقدر نمزج بين أكثر من طراز في المكان الواحد بطريقة شيك ومتناسقة في نفس الوقت؟
طبعا نقدر نمزج بين الطرازات المختلفة، وعندنا أمثلة كتيرة؛ فممكن مثلا:

مزج الطراز الفرنسي مع الطراز المكسيكي.. عن طريق وضع فوتاي من طراز "لويس كانز" مع كنبة مودرن متنجدة بقماش عليه نقوشات أو زخارف مكسيكية.

أو مزج الطراز الفرنسي مع الإسلامي.. عن طريق وضع كنبة من طراز الباروك الفرنسي، ومعاها لوحة أو استيكرز، أو حتى قماش التنجيد يكون عليه زخارف إسلامية مبسطة.

وفيه دلوقتي موضة جديدة بيعتبرها البعض غريبة بتعبّر عن فكرة دمج الطرازات؛ وهي التشكيل أو التنويع في كراسي السفرة؛ يعني تكون السفرة مكوّنة من كرسيين بشكل وطراز معين، واتنين بشكل آخر من طراز آخر، أو يكونوا كلهم شكل واحد لكن تنجيد كل اتنين مختلف عن الآخرين.


الخشب بيعطي دفء الطراز الإسلامي



وهل الخامات كمان بتدي انطباع بطراز معين؟
كل طراز وله طبعا الخامات اللي بتظهره؛ فمثلا:

الخشب: بيعطي دفء الطراز الإسلامي.
الاستيل: بيعطي الإحساس بأناقة الطراز الفرنسي والكلاسيكي.
الأحجار: بتعطي الإحساس الفرعوني أو الروماني.
الحديد المشغول: بيعتبر من الخامات المحايدة؛ لأنها بتُشكّل على حسب الطراز المطلوب.

حتى كمان الأرضيات اللي بتكون سيراميك أو رخام ولكن فيها زخارف، بتعطي الإحساس بالطراز الإسلامي، وفيه كمان خامات أخرى؛ مثل الخرز والفرو والنحاس بيعطوا أحاسيس لطرازات مختلفة في نفس المكان؛ لكن بشرط تنسيقهم.

طيب وبالنسبة للألوان؟
الألوان كمان بتُستخدم لتعطي الإحساس بطراز معين؛ فمثلا: الأحمر بيعبّر عن الطراز الإسلامي، والآسيوي المُدّهب بيعبّر عن الطراز الفرنسي، بس ده في حالة لو كان الفرش بسيط أو مودرن؛ إنما لو كان الفرش فيه بعض الشغل أو الأويمات، فيُفضّل ساعتها إن الألوان تكون هادية لراحة العين.

إزاى نختار الإضاءة اللي بتكون ماشية مع الأثاث النيوكلاسيك؟
فيه نجف كريستال دلوقتي مبسّط جدا، وبيعطي إحساس بالطراز الفرنسي أو الأوروبي، وفيه منه ألوان جديدة؛ زي: الموف الغامق والأخضر.

وكمان بنلاقي فوانيس الإضاءة الإسلامية بكل أشكالها وأحجامها؛ ومنها الفضي والنحاسي؛ فهي تعطي إحساس بالجو العربي الإسلامي حتى ولو كانت مع الطراز المودرن، وممكن نستخدم أبليكات على الطراز العربي/ الفرنسي، أو نسلط إضاءة خافتة على لوحات أو أشغال فضية موجودة على الحائط، ده غير كمان إن فيه نجف مصنوع من الفورفورجيه الأبيض دلوقتي.

هل ممكن نستخدم أثاث مودرن وفي نفس الوقت نحافظ على الروح الكلاسيكية؟
ممكن يكون الفرش كله مودرن؛ لكن الإحساس بالطراز الكلاسيكي يوصل عن طريق تابلوه، أو رسومات على الحائط، أو حتى على الكرانيش اللي ممكن تخدم الطراز بشكل مُبسّط وغير معقد.


ممكن نستخدم السجاد العجمي أو التركي

إزاي نختار الستائر والسجاد المناسبين للشكل ده من الأثاث والفرش؟
الستائر المنتشرة دلوقتي هي الستائر الروماني؛ وهي ستائر رأسية، وبتكون من قماش عادي، وعليها ستائر أفقية عادية من الجانبين، ومن نفس نقشة وألوان القماش الموجودة في الفرش.. أما السجاد فبيكون السجاد العجمي أو التركي أو حتى الكليم.

ودلوقتي السجاد بيكون من تصميم العميل نفسه؛ يعني أصمم أي شكل أنا عايزاه وأي مصنع سجاد يقدر ينفّذ لي التصميم.

هل ممكن أصمم من شكل الرخام أو الباركيه نفس التصميم اللي أنا عايزاه على شكل سجادة؟
ممكن طبعا لأن الباركيه نفسه بياخد أشكال هندسية أو شغل قشرة في زخرفة الخشب، وبيكون عن طريق تقطيع القشرة إلى ألوان مختلفة، وأقصها جنب بعض بطريقة التفريغ على شكل مساحات صغيرة أو مساحات كبيرة.

مهندس الديكور هو اللي بيعمل التصميم والنجار أو الصنايعي بينفذه، ونفس الحكاية على الرخام وخاصة الملوّن، وعن طريق الليزر بنقطّع الرخام وبنحطه جنب بعض لتعطي شكل سجادة.

أما بالنسبة للقنالتكس فبدل ما أعمل أحمر وأسود وأبيض المعروفين والمنتشرين، أقوم بعمل تصميم على الكمبيوتر، وبعد كده أسلّمه للنجار يقصّه ويحطه جنب بعضه بطريقة زخرفية.