بارت 4 من حملة دلعي نفسك ومتضيعيش وقتك . المذاكرة وطريقة المذاكرة الصح

ازيكم يا بنات وحشتونى اوى




امبارح منزلتش بارت
بس نزلته من شوية كدة
وهى دى البارتات اللى فاتت
https://adlat.net/showthread.php?t=274638
https://adlat.net/showthread.php?t=274721
https://adlat.net/showthread.php?t=274959
بارت النهاردة طويل شوية
المذاكرة
قبل ما أبدأ البارت عايزة اقولكم انى الحمد لله ومش بفخر بنفسي والله انا الطالبة المثالية على مستوى المدرسة وأمينة فصلي وكمان الاولي عالمدرسة الحمد لله
بكرر مش بفخر بنفسي والله بس هقولكم على روتيني فالمذاكرة
طبعا اكترنا بيحس بصداع فظييييع ايام المدرسة بالذات اللى بيبقي عندهم اجتماعات ووجع دماغ زيي كدة
وبنقول الكلمة المشهورة " هنام النهاردة واذاكر بكرة اللى كنت هذاكره النهاردة " وممكن تضتري انك تكدبي فالمدرسة عشان معملتيش الواجب او النشاط اللى عليكي وطبعا مش هقولك عقوبة الكدب مش هقول غير انك لو عملتى كدة هتبقي بتخافي من الخلق مش الخالق غير كدة بقي بكرة دا هييجي وتلاقي وراكي مذاكرة كتير وحل تدريبات الكتب الخارجية و كتب المدرسة والملازم والانشطة وواجب المدرسة طب علي ايه كل دا
هقولك على طريقة مذاكرة كل مادة
بس هنحط اساس كدة لكل المواد لا تؤجل عمل اليوم الى الغد
اللغة العربية
اكتر مادة انا شخصيا بواجه فيها صعوبة مع انها مادة سهل جدا انك تجمعي درجات فيها بس هي مادة فروعها كتير
اول حاجة النصوص والقراءة هقولهم مع بعض لأنهم شبه بعض اوى فالمذاكرة هنقروا الدرس او النص كويس اوى ونحاول نفهمه ونروح لمعانى الكلمات ونحفظها ولو نص اشرحيه واحفظي النص لو هو حفظ ولو موضوع قراءة حاولي تلخصي الدرس فى مخك بالكلام كدة وبعد كدة حلي التدريبات بتاعة الكتب الخارجية وكتاب المدرسة والملازم ولو معندكيش الا كتاب المدرسة ومبحبيش تجيبي كتب خارجية النت مليان مذكرات حملي مذكرات واطبعيها عندك لو عندك طابعة لو معندكيش حطيها على فلاشة وروحي المكتبة تطبعهالك
القصة بقي " القصة بالذات مينفعش نأجلها خالص لأنها بتطير بسرعة جدا من المخ لازم نذاكرها ف يومها وتقري فصل القصة كويس وتحفظي المعانى وتحلي التدريبات من الكتاب والكتب الخارجية والملازم
النحو " النحو فهم مش حفظ يا جماعة عشان سعات فالقطع بيجيلك الفاعل بعيد عن الفعل وبيحب يحيرنا معاه فلازم نحل كتير مع مدرس المدرسة ولو انتى مش بتاخدى درس حلي فالكتاب الخارجي واديه للأستاذ بتاعك يصححه مش هيقولك حاجة بالعكس هيفرح ان واحدة شاطرة زيك مبتاخدش درس بتحل وتوديله يصححلها
التعبير بقي مفيش اسهل منو بس هو محتاج انك تقري وتبقي مثقفة بالنسبة للايات والاحاديث والمعلومات العامة بس يعنى
العلوم والدراسات

محتاج تركيز فالمعلومات العامة اللى الاستاذة بتقولها علشان تربطلك كلو ببعضو ولما تروحي اقري الدرس من الكتاب الخارجي وبعد كدة روحي اللمفكرة اللى بتيجي مع الكتاب الخارجي دى واحفظي المصطحات والتعليلات والنتائج ولو العلوم افهمي المعادلات متحفظيهاش عشان لو حفظتيها هتغرقي ف ثانوي وبعد كدة روحي حلي تدريبات الكتاب الخارجي ولو كتاب المدرسة الاستاذة محلتهوش معاكم حليه انتى لأن الامتحان مش بيطلع من الكتاب المدرسي وبعد كدة حلي واجب المدرسة اللى عليكي
ومحتاجة برضو مراجعة على كل الدروس اول بأول وهقولكم على الطريقةدى تحت والدراسات بقي محتاج دراسة الخريطة الى جانب روتين مذاكرة العلوم
اللغة الانجليزية
بتحتاج تركيز جامد مع المس او المستر لما بيكونو بيشرحو بالذات القواعد وكمان بتحتاج حفظ كلمات وحفظ القواعد وحل كتير وبرضو حد يصححلك حلي فالكتاب الخارجي واديه للمس تصححهولك مش هتقول حاجة برضو
الرياضيات
اللى اغلبكم بيكرهها مش عارفة ليه مادة لذيذة والله بس محتاجة حل كتير وفهم جامد وتركيز مع المدرس لما بيكون بيشرح اللى ناخده فالمدرسة او الدرس نراجع عليه تانى ونحل تدريبات كتاب المدرسة عالاقل ولازم كتاب المدرسة بتحل كلو قبل الامتحان وكمان لو كراسة الواجب او المذكرة الطويلة اللى بتيجي مع الكتاب الخارجي لو عندك برضو تتحل
التربية الدينية
محتاجة بس حفظ السور المقرر حفظها والايات القصيرة اللى بتبقي فالدروس والاحاديث نفس الحكاية ومذاكرة الدرس كويس وحل تدريبات الكتاب المدرسي
قصة الدين بقي محتاجة ترتيب الأحداث وربطها ببعضها وبس
الفني والاقتصاد والمواد الفرعية
اكيد فى بنات بتتريق هما دول بيحتاجو مذاكرة
ايوة عندنا بيحتاجو مذاكرة الثقافة الفنية مثلا بتحتاج مذاكرة وتركيز جامد وكذلك باقي المواد الفرعية
خلاصة الهري والعجن اللى فوق دا بقي انك متأجليش مذاكرة اي مادة ولا اى درس لأي يوم حتى لو كان قريب واخر كل اسبوع تروحي تراجعي دروس كل المواد من اول ما بدأتو دراسة لحد ما انتى قاعدة تراجعي دلوقتى عشان ايام الامتحانات تحلي اكتر وتحصلي درجات اكتر
كمان مش لازم تاخدى دروس فكل المواد عشان تبقي متفوقة انا مثلا مباخدش الا درس رياضة ودرس عربي والحمد لله متفوقة يعنى انتى المفروض تاخدى دروس فالمواد اللى تعتبرى انتى ضعيفة فيها او محتاجة تقوية فيها اكتر
شوية نصائح بقي كدة فنهاية الموضوع
1- مذاكرة المواد فاليوم الواحد ميزدوش عن 4 مواد والا المعلومات مش هتثبت ف دماغك
2- الصلاة ثم الصلاة زي ما اتفقنا مع بعض بقي وكمان قراءة القران
3- الادعية بتاعة قبل المذاكرة وبعد المذاكرة تقوليها
4- لا تؤجلي عمل اليوم الى الغد
5- متبدأيش مذاكرة الا لما يكون ذهنك صافي وتعملي كل اللى عايزة تعمليه عشان مش كل شوية نقوم من عالمذاكرة
يارب يكون البارت ده عجبكو لاتنسونى بصالح الدعاء
والتقييم كمان اوعكم تنسوا بالله عليكم
وارجوكو ردوا لانه بعد كده اللى مش هترد هعرف انها مبتقراش فمش هبعتلها رابط الموضوع
واشوفكوا فى بارت جديد
فى امان الله
[/U]