قفشات في غرفة العمليات

بما انك مشيتوا اكتئابي ربنا يفرح قلوبكم وفكرتوني بالذي مضى , قلت أحكيلكم عن أول ولادة والحلقة الجاية أحكيلكم عن الولادة التانية , ذكرياتي مش حلوة ومهيسة زيكم بس ححكيها , صممت عشان اول ولادة اولد جنب امي , وامي كانت عايشه في بلد غير قبرص , وعشان في واحدة حامل في البيت تلاقي كل ماتيجي واحدة من صحابها تحكي عن ولادتها وكلهم كانوا أرشانات وكنت استغرب إزاي لسه فاكرين ( بس اتضح انها حاجة متتنسيش مهما كبرنا ) وحفظت منهم معلومة غلط ان بين أول طلقة والتانية في ساعة , المهم أمي كل يوم مسكينة متتحركش من البيت عشان فاكرة اني حولد , وفي اليوم الموعود قالت لنفسها دي كل يوم بتقول حولد ومبتولدش , أحسن اروح اجيب حاجات للبيت , صحيت أنا على أول طلقة وقلت لنفسي بس التانية بعد ساعة , قمت زي الشاطرة أحوك رجلي بالحجر ههههههه عشان وهى ممدودة قدام الدكتور تكون شيك , ويادوب خلصت وجت الطلقة التانيه والتالته , لبست بسرعة ومش أتلفن للتاكسي لأ افتكرت ان ممكن اسوق , يادوب بفتح باب العربية والطلق ورا بعضوا , شفت عربية جاية من بعيد شاورتله , بدون كلمة أخد الشنطة من العربية وقالي المستشفى اسمها ايه ؟ وصلت المستشفى , شافتني النيرس كانت مصرية , برغم الوجع كنت مشغوله بشكلها كان لها مقعدة تحطي عليها اللابتوب ميتزحلقش هههههه , قالتلي جاية لوحدك !! يالهوي على بنات الأيام دي , انا عيطت , قالتلي متخافيش دي الولادة حلوة كل يوم حيأكلوكي فرخة ههههههه ست طفصة مع ان في الوقت ده الفرخة كان بباون يعني رخيصة ,هى دي كانت الكوميدي في قصتي , بعدها أمي أكتشفت ان شنطة البيبي مش موجودة عرفت اني في المستشفى جتلي بس كنت ولدت وفقت من البنج كمان