عدلات - اللي عايزة بيتها يبرق من النضافة والريحة الحلوة (ببلاش ) تتفضل

عدلات (https://adlat.net/index.php)

- افكار وتجارب منزلية (https://adlat.net/forumdisplay.php?f=41)

- - اللي عايزة بيتها يبرق من النضافة والريحة الحلوة (ببلاش ) تتفضل (https://adlat.net/showthread.php?t=21627)

علا 2011

19-10-2011 03:29 PM

اللي عايزة بيتها يبرق من النضافة والريحة الحلوة (ببلاش ) تتفضل

الموضوع دة لكل ست بيت شاطرة عايزة توفر في عز الغلا اللي احنا فيه وفنفس الوقت عايزة بيتها بيبرق من النظافة في زحمة المنظفات اللي مالية السوق اشكال والوان وبتغريكي وبعدين تخربلك الميزانية طب هتعملي اييييييييييه ؟

اناهقولك ياست الكل على كل منتج وبديله (من بيتك ومش هتجيبي حاجة من برة )والنتيجة بيتك هيزهزه من النضافة والريحة الحلوة

البريل والجنرال
هتشتري ازازة بريل واحدة واقسميها اتنين في ازازة بريل اوجنرال فاضية عندك وكملي كل واحدة للاخر بالخليط السحري دة (كباية خل +كباية مية +نص كباية كربونات الصوديوم )دوبيهم الاول كويس لحد مايبانلهم صاحب وبعدين ضيفيه على نص الازازة ورجيها هتلاقي لونها بقة اخضر فاتح مش شفاف زي البلسم كدة دلوقتي عندنا ازازتين واحدة حطيها في المطبخ (للصحون والكبايات والحلل)وماقولكيش والله هيبرقوا اكتر مالبريل لوحده وبرده للبتوجاز والحوض والرخام وكله
التانية هتحطيها في الحمام بدل الجنرال هتخلي الصحي والحنفيات يلمعوا والارضية كمان بعد ماتدعكيها بالفرشة والكلور
ومسح الشقة هتاخدي غطا واحد من الخلطةونقطتين زيت عطري مركز (لافندر او ليمون او ياسمين ) على جردل المية

الجلانس (ملمع الزجاج )

بخاخة مية ومعلقتين خل وبسسسس المرايات والزجاج والنجف هيبرق (دة حتى جلانس بيجير عالمراية )

البليدج (ملمع الاثاث )

خليط زيت الزيتون (اوحتى زيت عادي )+الخل بدون مية عشان الخشب مايشققش 000 هترجع الموبيليا جديدة
وبالنسبة للمطبخ الخشب عشان الدهون مالقيتش احسن مالجاز بحتة قماشة ناشفة

الديتول

هتستبدليه بالفنيك (بس مابحبش ريحته)او الكلور اللي مكتوب عليه يقضي على 99%من الجراثيم هيعقم ويبيض كمان

بطة او هاربيك للتواليت

هتنضفيه بالفرشة بخلطة البريل بتاعتنا وبعدين شوية كلور للتطهير سيبهم 10 دقايق وشدي السيفون هيبقى فل طب والتعطير هاتي نفتلين بلية ورشي عليه شوية فانيليا او زيت عطري هوا هيمص الريحة وحطيه في كيس شيفون من بتاع السبوع وعلقيه في الحمام

الفلاش او مية النار

وده لتنضيف السيراميك والخطوط اللي بينه هتكبي كلور بدون تخفيف علارض وسبيه متنقع نص ساعة وبعدين ادعكي بالفرشة او بملح اللمون العجيب وبالفرشة اوالسلك

باور او مستر ماسل مذيب الدهون

ملح اللمون او الخل والمية المغلية عشان دهون الحلل
بخاخة الجاز والسلك او (مية سخنة +كلور +بريل) عشان الدهون اللي عالحيطة
اسفنجة اغمسيها بخلطة البريل السحرية وامسحي بيها الفرن وهوا سخن (بعد ماتعملي كيكة مثلا ) الدهون هتطلع في ثانية

شامبو السجاد والانتريه

ده بقة بخلطة عدلات السحرية (جردل مية +كلور الوان +تايد+خل +كربونات )

جليد (معطر الجو الاسبراي او الجهاز )

أي زيت عطري مركز ب2.5 لافندر او ياسمين او مسك فرغيه فجهاز ريد بتاع الناموس والريحة هتطلع للجيران (دة عدولة هنا اللي قالت عليه واناعملتها رووعة ربنا يباركلها) ولو معندكيش الجهاز اغلي شوية مية فأي كنكة قديمة وضيفي 5نقط زيت عطري وامشي في الشقة الريحة هتلزق

المسحوق الاتوماتيك

ضيفي على كيس التايد ال4 كيلو (2كيلو مسحوق يدوي )وقلبي كويس اولا هيكتر الكمية وهينضف احسن ومشششش هيبوظ الغسالة صاحبتي بتحلف بالله ان مامتها بتعمل كدة من 13 سنة والغسالة ماشاء الله لاقوة الا بالله
واللي خايفة تضيف 2كيلو من المسحوق الاتوماتيك السايب الكيلو ب6 جنيه

الداوني او الكمفورت (معطر الملابس )

هتقولي الست دي اتجننت وهما دول كمان ليهم بديل ايوة ضيفي على مية الشطف فدرج الغسالة في الاخر 3 نقط بالقطارة (على الفم كله ) زيت المسك الأبيض او زيت الياسمين او أي ريحة هيدي ريحة حلوة ومالوش أي اثر عالهدوم

والله يرحم ستي وستك ماكانش عندهم منظفات اليومين دول (هيا يادوب صابونة النابلسي السودة كمان حتى مش البيضة ) وبيوتهم كانت بتبرق من النضافة

ايه رايكم يا حلوييين ؟؟؟؟؟؟

لافالانتينا

19-10-2011 03:33 PM