عدلات - طريقة عمل المحشى بأنواعه طريقتى فى عمل المحشى اسهل طريقه لعمل المحشى بأنواعه من مطبخى

عدلات (https://adlat.net/index.php)

- من مطبخي (https://adlat.net/forumdisplay.php?f=178)

طريقة عمل المحشى بأنواعه طريقتى فى عمل المحشى اسهل طريقه لعمل المحشى بأنواعه من مطبخى

https://upload.3dlat.com/uploads/3dl...9_2f686865.gif

لو عايزه تعملى محشى ومحتاره تعالى هقولك على طريقه سهله وبسيطه عشان تعملى احلى محشى
تابعينى

https://upload.3dlat.com/uploads/13883499512.jpg

المقادير

بذنجان وكوسه وفلفل رومى او كرنب او ورق عنب حسب ما تحبى

1 ك رز مصرى

2 حبة فلفل رومى

4 حزم خضره مشكله (شبت -بقدونس-كزبره)

2 بصله كبيره

كيلو ونص طماطم

ملح - فلفل-بهارات-كمون

معلقتين صلصه كبيره

معلقه صغيره نعناع مجفف

الطريقه

اول خطوه هتسلقى الكرنبه فى ميه بتغلى عالنار فيها معلقة ملح ومعلقة كمون خشن

لو ورق عنب هتحطيه فى الميه المغليه ثوانى وتطلعيه على طول مش بياخد وقت

ولو بدنجان وكوسه وفلفل يبقى هنضفهم من جوه (نقورهم) ونغسلهم ونصفيهم فى مصفاه

تانى حاجه هتقطعى البصل او تفرميه وعالنار تحطى زيت كتير شويه وتفضلى تقلبى فى البصل لحد ما يصفر معاكى شويتين يعنى وسط متحرقيهوش

بعد كده هتضربى الطماطم فى الخلاط وتحطيها على البصله وتسيبيها تغلى وبمجرد ما تغلى تحطى الملح والفلفل والبهارات واهم حاااااااااااجه هو الكمون تحطى منه زياده حبتين وبعد كده تحطى الصلصه وتقلبى واول ما تتسبك كويس تحطى معلقة النعناع و تكونى غسلتى الرز وصفتيه فى المصفاه

تحطيه عالخلطه وتقلبيه كويس جدا لحد ما يسخن و يتشرب من الخلطه بعدها هتطفى النار تكونى مقطعه الخضره هتحطيها وتقلبيها(فى ناس بتحط الخضره عالصلصه وهيا بتتسبك بس الطريقه اللى بقولك عليها بتحافظ على طعم الخضره ولونها)

فى خطوه شفت حماتى بتعملها وعملتها زيها ولاقيتها طعمها حلو فعلا

بعد ما تخلصى الخلطه وقبل الحشو هتقطعى بصله متوسطه عليها وتقلبيها كويس

نيجى للتسويه

هتجيبى الحله اللى هتحشى فيها وهتحطى فيها من تحت طماطم وبصل متقطعين حلقات لو مش حابه بلاش بس الخطوه دى بتدى طعم حلو للمحشى

بعد كده هتقطعى ورق الكرنب مستطيلات او مربعات بالمقاس اللى تحبيه وتبتدى تحشى وترصيه فى الحله

بالنسبه لورق العنب بفضل اجيب الصغير عشان يتحشى معايا بسهوله

بعد الحشو

هتكونى محضره عندك شوربه سخننننننننه تسقى بيها المحشى وطبعا تكونى حاطه فيها البهارات والملح والفلفل والحبهان وبصل مبشور وطماطم وجزر مبشورين ومعلقة صلصه وممكن مكعب مرقه لو بتحبيها (انا بفضل احط بدالها توابل الفراخ اضمن )

هتسقى المحشى لحد ما توصلى لاول صف فى الحله يعنى الشوربه تغطى المحشى زى الرز كده بس حاجه بسيطه مش قوى

وتسيبيه يغلى على نار عاليه لحد ما تلاقى الشوربه نقصت هتهدى النار خالص وتسيبيه لحد ما يستوى براحته

ودى صورة محشى الكرنب بتاعى

https://upload.3dlat.com/uploads/13883499516.jpg

https://up.3dlat.com/uploads/13883499515.jpg

ودى صور من النت لباقي المحاشى

https://upload.3dlat.com/uploads/3dl...3381591527.jpg

https://upload.3dlat.com/uploads/3dl...328374803.jpeg

https://upload.3dlat.com/uploads/3dl...5_65b9_274.jpg

اتمنى يكون الموضوع عجبكم
لو عجبك الموضوع انشريه لاصدقائك عشان يشوفوه عالفيس بوك او تويتر او جوجل بلاس

:0451:الموضوع حصرى وغير منقول:0451: