عدلات - بلمسات بسيطة...ديكور بيتك رمضانى جدا

دايما لما بنيجي نستعد لرمضان مش بنفكر غير في الأكل وخزين البيت، وجبنا الياميش ولّا لأ، وبننسى دايما إزاي نحضّر نفسنا للاستمتاع بأجواء الشهر الكريم اللي بنستناه من السنة للسنة، علشان كده بقول لكل ست بيت نصايح بسيطة جدا ممكن تعملها في بيتها علشان تضيف له إحساس وجو خاص مناسب مع الشهر الكريم..

1- الفانوس مش للعيال وبس
اشتري فانوس كبير يكون حجمه مناسب مع الريسبشن عندك، وحطّيه في مكان مميز جدا، وممكن تحطّي حواليه مجموعة من الفوانيس الصغيرة اللي كانت موجودة عندك من السنين اللي فاتت.. وعلشان تعملي جو الخيم الرمضانية، ممكن تجيبي فرع أو فرعين من فروع النور اللي بتبقى على شكل فوانيس صغيرة، وتعلّقيها على الحيطة عندك، وتشغّليها بالليل أو لما يبقى عندك ضيوف.

2- عودة للفلكلور الشعبي
دايما لما بنحب نعمل حاجات بسيطة علشان نغيّر شكل البيت، أول حاجة بتيجي في بالنا هي تغيير تلبيسات الخداديات اللي بتبقى موجودة في الصالون والأنتريه.

طب إيه رأيك لو عملتي التلبيسات دي من قماش الخيامية، وده على فكرة مش غالي خالص ومش هيكلّفك كتير، ده غير إن ألوانه متداخلة وغامقة، وده طبعا مناسب جدا مع رمضان والعزومات والضيوف الكتير.

مش بس كده، ده إنتي ممكن تستغني عن السجاجيد خالص في رمضان، وتستبدليها بالكليم العربي، وده طبعا هيدّي شكل جديد ومختلف للبيت، ده غير إنه هيبقى سهل في تنضيفه.

3- المبخرة.. سحر خاص ورائحة مميزة
مهما استخدمنا معطرات للجو غالية وبروايح جميلة، لكن عمرها ما بتدينا نفس الإحساس اللي بنستمتع به لما نشم رائحة البخور الطبيعي، وخاصة في رمضان.. فإيه رأيك لو السنة دي اشتريتي مبخرة نحاس من خان الخليلي، وشوية بخور بروايح جميلة من عند العطار، وتحطّيها على ترابيزة متغطية بمفرش من قماش الخيامية في ركن من أركان البيت، وتستمتعي إنتي وأسرتك وضيوفك برائحة البخور الجميلة والمميزة.

4- ديكورات فنية بلمسة طفولية
لو عندك أطفال صغيرين ممكن تستغلي حبهم للرسم والتلوين، في إنك تعملي لهم ديكور جديد لغرفتهم من تصميمهم، يعني ممكن تعملوا مع بعض فوانيس من الورق أو الكرتون وتخلّيهم يلوّنوها بالألوان اللي هم بيحبّوها، وبعد كده تعلّقوها في الغرفة بشكل جميل.

وتقدري تستغلي كمان الموضوع ده في إنك تلفتي انتباه أطفالك بشكل جذاب وغير مباشر لسبب اختلاف رمضان عن باقي السنة، في إنك تحكي لهم حكايات بسيطة عن شهر رمضان وليه ربنا فرض فيه الصيام ويعني إيه صيام -ده في حالة إنهم يكونوا صغيرين أوي- وتقدري تنزلي من على النت رسومات للتلوين تكون بتعبّر عن مظاهر الاحتفال بشهر رمضان، وتلوّنوها مع بعض وتعلّقوها مع الفوانيس.

وبكده تستمتعي برمضان في بيتك بشكل مختلف..
وكل سنة وكلكم طيبين وبخير،،،