عدلات - ازاى تختارى صحباتك البنات , نصايح لاختيار صديقاتك , كيف تختاري صديقتك المناسبه

عدلات (https://adlat.net/index.php)

- فتيات تحت العشرين (https://adlat.net/forumdisplay.php?f=55)

ازاى تختارى صحباتك البنات , نصايح لاختيار صديقاتك , كيف تختاري صديقتك المناسبه

https://upload.3dlat.com/uploads/3dl...08318ce961.gif

اكيد فى اوقات كتير كنتى محتارة ازاي تختاري صحباتك البنات وقابلتى ناس مكنتيش عارفة اذا كانوا ينفعوا اصحاب ولا لأ؟ وهل هم محل ثقة و لا لأ؟
شوفى النصايح دى وان شاءالله تستفيدى

1– الثقة:

دورى على اشخاص تثقى فيهم لان دى من اهم الصفات اللى لازم تكون فى الصديقة … انك تلاقى حد تعتمدى عليه دى من اساسيات شخصية صديقتك لانكم هتحكوا لبعض قصص واسرار ولازم تكونى عارفة انها مش هتتحكى لحد بره و لازم كمان تكونى واثقة انك تقدرى تعتمدى عليهم فى اى وقت وانهم يساعدوكى من غير مقابل, وحتي 100 خط تحت من غير مقابل ديه.
2 – الصديق وقت الضيق:

اختارى الاصحاب اللى بيسندوكى و يكونوا معاكى دايما فى اى موقف اذا كان حلو او وحش او اذا كان موقف بسيط فى حياتك اليومية او موقف مهم وحصل فى حياتك و شوفى مين اللى هتديكى نصيحة لما تحتاجيها ومين اللي ممكن تخصصلك وقت وتبذل مجهود عشان إنتي محتجاها ولو مش عارفة ومحتارة حاولى تسألى كذا واحدة من اصحابك فى مواقف كثير وهتقدرى تقررى مين فيهم اللى تستاهل تكون قريبة منك.
3 – داء السيطرة:

ابعدى عن البنات اللى عندها حب السيطرة لان الصداقة الصحيحة هى اللى بتديكى مساحة وحرية من غير تحكمات كتير وكمان تكون بتحترم قراراتك واختياراتك … لو صاحبتك دايما بتحب تتحكم فى كل حاجة تأكدى ان العلاقة دى اخرتها مش حلوة ليكى لأنها مع الوقت هتأثر علي ثقتك في نفسك وقدرتك علي اتخاذ قرارات.. لما تيجوا تتفقوا على مواعيد مهمة او اماكن تروحوها سوا كونى واثقة ان القرار اخدتوه سوا مش هى اللى سيطرت عليكى و فرضت رأيها حتى لو مش مناسب ليكى و لازم تعرفى انكم اصحاب و برده مختلفين كل واحد ليه شخصيته و رأيه .
4 – نقل الكلام و الاسرار:

ابعدى عن اى واحدة طول النهار تنقلك اخبار وتتكلم على الناس فى حلو او وحش و مش بتسيب حد فى حاله عشان هيجى يوم فى الايام و تنقل اخبارك و تتكلم عليكى و دى اسمها صديقتك فأكيد معاها كل اسرارك . الشخص اللى بينقل الكلام غير موثوق فيه و تصرفاته طفولية و لو لقيتى حد نقل كلام عنك لازم تواجهيها و تناقشى الموضوع معاها.

نصايح مهمة :
خليكى واثقة ان مفيش صداقة جميلة بتحصل فى يوم و ليلة
و من المهم ان احنا نقابل ناس كتير و نكون خبرات و نتصدم فى اصحاب لحد ما نلاقى الناس اللى تستاهل.
لو جيه عليكى وقت و كنتى لوحدك من غير اصحاب كويسين متزعليش و اتعودى تكونى لوحدك لحد ما تلاقى حد يستاهل ثقتك.
متقفشيش مع صحباتك على كل حاجة و اتعلمى تفوتى و تكبرى دماغك لو حصل موقف بسيط ضايقك لان فى النهاية دول صحباتك و مش هينفع تقفي على حاجات ممكن كانت تعدي بشوية تفاهم.
متحسسيش اصحابك ان كل حياتهم معاكى و احترمى خصوصياتهم احيانا الواحد بيحتاج مساحة حرية لنفسه و لوحده.
ونفس الكلام ليكي حاولي تخلصي جزء من الخصوصية في حياتك ميكونش حد تاني عارفة غيرك.

https://upload.3dlat.com/uploads/3dl...d7f4cee152.gif